Dathlwyd chwaraewyr talentog Sir Gaerfyrddin yng Ngwobrau Chwaraeon Actif Sir Gaerfyrddin 2021 nos Iau (10fed Mawrth).
Cafodd y gwobrau eu cynnal am yr 22ain tro yn Theatr y Ffwrnes yn Llanelli a’u trefnu gan dîm Chwaraeon a Hamdden Cyngor Sir Caerfyrddin.
Roedd Gwobrau Chwaraeon blynyddol Actif Sir Gaerfyrddin yn cydnabod cyflawniadau a llwyddiannau athletwyr unigol a chlybiau chwaraeon, yn ogystal â chydnabod cyfraniad hyfforddwyr ymroddedig a gwirfoddolwyr gweithgar sy'n gwneud gwahaniaeth drwy chwaraeon a'u cymunedau.
Eleni, roeddem hefyd yn diolch i unigolion, timau a chlybiau a oedd, er gwaethaf pandemig COVID-19, wedi goresgyn adfyd i ysbrydoli eraill i fod yn egnïol yn ystod y cyfyngiadau symud.
Y seremoni yw un o'r nosweithiau mwyaf mawreddog yng nghalendr chwaraeon Sir Gaerfyrddin. Nigel Owens MBE, cyflwynydd a dyfarnwr rygbi'r undeb, oedd yn cyflwyno'r noson.
Yn ogystal â Gwobr Personoliaeth Chwaraeon y Flwyddyn, roedd y categorïau'n cynnwys Mabolgampwr a Mabolgampwraig Ifanc, Hyfforddwr Chwaraeon Cymunedol a Hyfforddwr Chwaraeon o Safon Uchel, Gwirfoddolwr Chwaraeon a Gwirfoddolwr Ifanc, Tîm Chwaraeon, Tîm Ifanc a Chlwb Cymunedol y Flwyddyn, Categori Gwasanaeth Eithriadol i Chwaraeon ac Oriel yr Anfarwolion.
Roedd mwy nag ugain o unigolion, chwe thîm a thri chlwb wedi cael eu henwebu ar gyfer cyfanswm o 12 gwobr. Roedd y gwobrau eleni yn cynnwys amrywiaeth o chwaraeon a chefndiroedd eto, gan gynnwys Athletau, Beicio, Hoci, Tennis, Gymnasteg, Pêl-droed, Codi Pwysau, Criced, Dartiau, Dawns, Rhwyfo, Karate, Judo a Saethu.
Daeth y rhai oedd wedi cyrraedd y rhestr fer, teuluoedd, cefnogwyr, noddwyr, staff y cyngor sir a gwesteion arbennig ynghyd yn y lleoliad yng nghanol canol tref Llanelli a chroesawyd y prif noddwyr, sef McDonalds.
Noddwyr categorïau gwobrau eraill eleni oedd 1st Line Funeral Care, Enzo's Homes Limited, Coleg Sir Gâr, Adeiladwyr TAD, Prifysgol Cymru - Y Drindod Dewi Sant a Chwaraeon Cymru.
Cafodd nid un ond dau o bobl sydd wedi derbyn MBE eu henwi i ymuno â rhai o Gewri Chwaraeon Sir Gaerfyrddin yn Oriel yr Anfarwolion, sef Robert Croft (Criced) a Dr Hedydd Davies (Athletau).
Cyflwynwyd gwobr INSPORT Arian i Chwaraeon a Hamdden Actif gan Tom Rogers, Rheolwr Partneriaeth o Chwaraeon Anabledd Cymru, ar ôl sicrhau achrediad am wasanaethau cynhwysol.
Elusen y noson oedd Mind Llanelli a Mind Caerfyrddin a rhoddodd gwesteion dros £700 tuag at waith yr achos teilwng hwn.
Talwyd teyrnged hefyd i'r 5 chwaraewr Rygbi Merched Cymru o Sir Gaerfyrddin a gafodd y contractau proffesiynol a lled-broffesiynol cyntaf erioed – Alisha Butchers, Bethan Lewis, Hannah Jones, Caitlin Lewis a Ffion Lewis.
Diolch i bawb a ddaeth i'r theatr, pawb a ymunodd â ni'n rhithwir ar-lein am y tro cyntaf a phawb a gefnogodd y seremoni wobrwyo nos Iau. Diolch i bawb a enwebodd unigolyn, tîm neu glwb ar gyfer y gwobrau eleni.
Pob lwc i bawb am y flwyddyn i ddod yn 2022.
